ຂ່າວຕ່າງແຂວງແລະໂລກ

ກອງປະຊຸມອາແຊັບ 7 ໄຂຂຶ້ນເປັນທາງການໃນມື້ນີ້ຢູ່ນະຄອນຫລວງວຽງຈັນ

ກອງປະຊຸມອາແຊັບ 7 ໄຂຂຶ້ນເປັນທາງການໃນມື້ນີ້ຢູ່ນະຄອນຫລວງວຽງຈັນ
 (ຂປລ): ກອງປະຊຸມການເປັນຄູ່ຮ່ວມລັດຖະສະພາ ອາຊີ-ເອີຣົບ ຄັ້ງທີ 7 ( ອາແຊັບ-7) ໃນຫົວຂໍ້ “ ການເປັນຄູ່ຮ່ວມລັດຖະສະພາອາຊີ-ເອີຣົບ ເພື່ອການພັດທະນາແບບຍືນຍົງ ” ໄດ້ໄຂຂຶ້ນຢ່າງເປັນທາງການໃນມື້ນີ້ ວັນທີ 3 ຕຸລາ 2012 ຢູ່ໂຮງແຮມດອນຈັນພາເລດ ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານ ສະພາ ແຫ່ງຊາດ ແລະ ກອງປະຊຸມດັ່ງກ່າວ ມີຄະນະຜູ້ແທນຈາກອາຊີ ແລະ ເອີຣົບ ປະເທດເຂົ້າຮ່ວມ 30 ກວ່າຄະນະ ຈາກ 27 ປະເທດ ແລະ ໜຶ່ງລັດຖະສະພາ, ສາມອົງ ການຈັດຕັ້ງສາກົນ ລວມທັງໝົດຫລາຍກວ່າ 250 ທ່ານ ເຊິ່ງກອງປະຊຸມຈະໄດ້ປຶກສາຫາລືບັນຫາສຳຄັນຕ່າງໆ ໂດຍສະເພາະປຶກສາຫາລືດ້ານເສດຖະກິດ, ສັງຄົມ ແລະ ສິ່ງ ແວດລ້ອມ.

ສປປ ລາວ ໄດ້ຮັບກຽດເປັນເຈົ້າ ພາບຈັດກອງປະຊຸມ ອາແຊັບ 7 ໃນວັນທີ 3-4 ຕຸລາ ເຊິ່ງກອງປະຊຸມຈະໄດ້ປຶກສາຫາລືຮ່ວມກັນ ລະຫວ່າງ ອາຊີ ແລະ ເອີຣົບ ໃນຫົວຂໍ້ສຳ ຄັນຕ່າງໆ, ໃນນີ້ກອງປະຊຸມຄົບຄະນະວາລະທຳອິດ ໃນວັນທີ 3 ຕຸລາ ຈະເລືອກຕັ້ງເອົາບຸກຄະລາກອນດຳເນີນກອງປະຊຸມ, ຮັບຮອງເອົາວາລະກອງປະຊຸມ ແລະ ຕາຕະລາງ ກອງປະຊຸມ, ຮັບຮອງເອົາລະບຽບການດຳເນີນກອງປະຊຸມ, ຮັບຮອງເອົາສະມາຊິກໃໝ່ ຂອງອາແຊັບ 7 ແລະ ການປະກອບຄຳເຫັນຂອງຫົວໜ້າຄະນະຜູ້ແທນແຕ່ລະປະເທດ. ພ້ອມນີ້ກໍຈະໄດ້ປະກາດລາຍຊື່ປະເທດສະມາຊິກໃໝ່ພ້ອມກັບການເຄື່ອນຍ້າຍທຸງຊາດ ໂດຍກອງກຽດຕິຍົດ ແລະ ຕິດຕາມໂດຍຄະນະຜູ້ແທນຂອງແຕ່ລະປະເທດ ສະມາຊິກໃໝ່, ການບັນເລງເພງຊາດ ຂອງແຕ່ລະປະເທດສະມາຊິກໃໝ່ ແລະ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ, ສປປ ລາວ ປະທານກອງປະຊຸມ ອາເຊັບ 7 ປະກອບຄຳເຫັນ ຕໍ່ກອງປະຊຸມ.

ໃນວັນທີ 4 ຕຸລາ ຈະໄດ້ເປີດກອງ ປະຊຸມປຶກສາຫາລື ກຸ່ມທີ 1 ຫົວຂໍ້ປຶກສາຫາລືດ້ານເສດຖະກິດ: ການຮັບປະກັນຄວາມໝັ້ນຄົງດ້ານສະບຽງອາຫານໃນສະພາບການປ່ຽນແປງ ດິນຟ້າອາກາດຂອງໂລກໃນປັດຈຸບັນ ແລະ ເພີ່ມທະວີການຮ່ວມມື ອາຊີ-ເອີຣົບ ໃນຂົງເຂດໜີ້ສາທາລະນະເພື່ອການພັດທະນາແບບຍືນຍົງ ເຊິ່ງສະເໜີໂດຍວິທະຍາກອນຈາກ ເອີຣົບ, ທ່ານ ນາງ ໄອລາ ປາໂລນີມີ ຫົວໜ້າຄະນະ ຜູ້ແທນແຟັງລັງ ແລະ ຈາກອາຊີ, ທ່ານ ຊັງ ຊຽວຊັນ ສະມາຊິກກຳມະການວຽກງານຊົນນະບົດ ແລະ ກະສິກຳ ສປ ຈີນ; ຈາກອາຊີ, ທ່ານ ເບ ກີ ວຸນ ຫົວໜ້າ ສະມາຊິກສະພາແຫ່ງຊາດ ຄັ້ງທີ 19, ກຳມາທິການສະຖາບັນປະຊາທິປະໄຕ, ສັນຕິພາບ ແລະ ສະຫວັດດີການ ສ.ເກົາຫລີ ແລະ ຈາກອົງ ການການເງິນສາກົນ: ທ່ານ ສັນໃຈ ການຣາ ຜູ້ຕາງໜ້າ IMF ປະຈຳ ສສ ຫວຽດນາມ ແລະ ສປປ ລາວ. ກອງປະຊຸມປຶກສາຫາລື ກຸ່ມທີ 2 ກ່ຽວກັບສັງຄົມ ແລະ ສິ່ງແວດລ້ອມ: ການເປັນຄູ່ຮ່ວມ ອາຊີ-ເອີຣົບ ຕໍ່ການເພີ່ມທະວີການມີສ່ວນຮ່ວມຂອງສັງຄົມເພື່ອຄຸ້ມຄອງໄພພິບັດສະເໜີໂດຍຊ່ຽວຊານຈາກອາຊີ, ທ່ານ ດຣ. ມາກ ຊູກິ ອາລີ ປະທານສະພາຕ່ຳ ສາທາລະນະລັດ ອິນໂດເນເຊຍ; ຈາກເອີຣົບ, ທ່ານ ຣິກ ທໍ ວຸດທິສະພາສູງແບນຊິກ ແລະ ບົດສະເໜີຈາກອົງການສະຫະປະຊາຊາດ ກ່ຽວກັບຍຸດທະສາດສາກົນຫລຸດຜ່ອນ ໄພພິບັດໂດຍທ່ານນາງ ເຟັງ ມິນ ກັນ ແລະ ຈັດກອງປະຊຸມ ຂອງຄະນະກຳມະການຮ່າງຖະແຫລງການອາເຊັບ 7. ໃນວາລະສຸດທ້າຍຂອງກອງປະຊຸມຄົບຄະນະ ຈະໄດ້ລາຍງານ ຜົນການປຶກສາຫາລືຂອງກຸ່ມ ທີ 1 ແລະ ກຸ່ມທີ 2, ການລາຍງານຂອງຄະນະກຳມະການຮ່າງຖະແຫລງການ ແລະ ຮັບຮອງເອົາຖະແຫລງການຂອງກອງປະຊຸມ ອາເຊັບ 7 ແລະ ພິທີປິດກອງປະຊຸມຢ່າງເປັນທາງການ.

ໂຄງກາບ ນຮອງຮັບອາເຊັມ ພ້ອມເກືອ100%

  ບັນ­ດາ​ພື້ນ­ຖານ​ໂຄງ​ລ່າງ ຮອງ​ຮັບ​ກອງ​ປະ­ຊຸມ​ອາ­ຊີ-ເອີຣົບ ຄັ້ງ​ທີ 9 ຫລື ອາ​ເຊັມ 9 ຫລາຍ​ຫນ້າ​ວຽກ​ສຳ­ເລັດ​ແລ້ວເກືອບ​ຮ້ອຍ​ເປີ­ເຊັນ ຍັງ​ເຫລືອພຽງ​ການ​ຕົກ­ແຕ່ງ​ພາຍ​ໃນ, ເກັບລາຍ​ລະ­ອຽດ​ເພີ່ມ​ເຕີມ​ກໍ່​ພ້ອມມອບ-ຮັບ​ໃນ​ກາງ​ເດືອນ​ຕຸ­ລາ​ນີ້.

ເຊົ້າ​ວານ​ນີ້, ບັນ­ດາ​ຄະ­ນະ​ຜູ້ແທນ​ປະ­ເທດ​ສະ­ມາ­ຊິກ​ອາ​ເຊັມ ໄດ້​ລົງ​ຕິດ­ຕາມ​ຢ້ຽມ­ຢາມ​ຄວາມຄືບ​ຫນ້າ​ບັນ­ດາ​ໂຄງ­ການ​ຮອງຮັບ​ອາ​ເຊັມ​ເປັນ­ຕົ້ນ: ໂຄງ­ການກໍ່­ສ້າງ​ຫໍ​ປະ­ຊຸມ​ແຫ່ງ​ຊາດ, ເຮືອນ​ພັກ​ປະ­ມຸກ​ລັດ, ການ​ກໍ່ສ້າງ​ລານ​ບິນ​ໃຫມ່ ແລະ ອາ­ຄານກຽດ­ຕິ­ຍົດ ເພື່ອ​ກວດ­ກາ​ຄວາມ ພ້ອມ​ໃນ​ການ​ຮອງ​ຮັບ​ກອງປະ­ຊຸມ​ອາ­ຊີ-ເອີ​ຣົບ ຄັ້ງ​ທີ 9 ທີ່ ສປປ ລາວ ເປັນ​ເຈົ້າ­ພາບ​ຈັດ ທ້າຍ​ປີ 2012 ນີ້.

ໃນ​ນັ້ນ, ໂຄງ­ການ​ກໍ່­ສ້າງ​ຫໍປະ­ຊຸມ​ແຫ່ງ​ຊາດ ປະ­ຈຸ​ບັນ​ ສຳເລັດ​ແລ້ວ 98% ຍັງ­ພຽງ​ວຽກຕົກ­ແຕ່ງ​ພາຍ​ໃນ, ກໍ່​ພ້ອມ​ຈະມອບ-ຮັບ​ກ່ອນ​ກອງ​ປະ­ຊຸມ​ອາ­ຊີ-ເອີ​ຮົບ ຄັ້ງ​ທີ 9, ສ່ວນ​ໂຄງ­ການ ກໍ່­ສ້າງ​ອາ­ຄານ​ກຽດ­ຕິ­ຍົດ​ຢູ່​ສະຫນາມ​ບິນ​ສາ­ກົນ​ວັດ​ໄຕ ເພື່ອຮອງ​ຮັບ​ບັນ­ດາ​ປະ­ມຸກ​ລັດ, ຫົວຫນ້າ​ຄະ­ນະ​ລັດ­ຖະ­ບານ, ຄະ­ນະຜູ້​ແທນ​ຕ່າງ­ປະ­ເທດ​ທີ່​ເດີນ­ທາງ​ເຂົ້າ​ມາ​ຮ່ວມ​ກອງ​ປະ­ຊຸມ​ຖື​ວ່າສຳ­ເລັດ​ແລ້ວ 100%.

ສຳ­ລັບ​ເຮືອນ​ພັກ​ປະ­ມຸກ​ລັດກໍ່​ມີ​ຄວາມ​ຄືບ​ຫນ້າ​ຫລາຍ​ດ້ານພາກ­ສ່ວນ​ທີ່​ກ່ຽວ­ຂ້ອງ​ກຳ­ລັງຂຸ້ນ­ຂ້ຽວ​ດຳ­ເນີນ​ການ​ທຸກ​ດ້ານເຊັ່ນ: ພື້ນ­ຖານ​ໂຄງ​ລ່າງ ປະ­ຈຸບັນ ​ສຳ­ເລັດ​ແລ້ວ 98%  ມີ​ພຽງວຽກ​ເກັບ​ລາຍ​ລະ­ອຽດ, ຈັດສວນ, ຕົກ­ແຕ່ງ​ພາຍ​ໃນ​ເພີ່ມ​ເຕີມກໍ່​ພ້ອມ​ມອບ-ຮັບ​ກ່ອນ​ກອງ​ປະຊຸມ​ອາ​ເຊັມ 9.

ໃນ​ຕອນ​ບ່າຍ​ຂອງ​ວັນ​ດຽວກັນ​ທີ່​ສູນ​ຝຶກ​ອົບ­ຮົມ ແລະ ການຮ່ວມ​ມື​ສາ­ກົນ (ICTC) ໄດ້​ມີກອງ​ປະ­ຊຸມ​ເຜີຍ­ແຜ່​ວຽກ​ງານດ້ານ​ພິ­ທີ­ການ ແລະ ການ​ຮັກ­ສາຄວາມ​ປອດ​ໄພ​ສຳ­ລັບ​ກອງ​ປະ ຊຸມ​ສຸດ​ຍອດ​ອາ​ເຊັມຄັ້ງ​ທີ 9,  ໂດຍ​ທ່ານ ໄຊ​ຍະ​ການ ສີ​ສຸ​ວົງຫົວ­ຫນ້າ​ຫ້ອງ­ການ​ກະ­ຊວງ​ການຕ່າງ­ປະ­ເທດ ທັງ​ເປັນ​ປະ­ທານກອງ​ປະ­ຊຸມ​ໃຫ້​ຮູ້​ວ່າ: ການ​ກະກຽມ​ເປັນ​ເຈົ້າ­ພາບ​ຈັດ​ກອງ​ປະ ຊຸມ​ອາ​ເຊັມ 9 ແລະ ກອງ​ປະ­ຊຸມປີ່ນ​ອ້ອມ​ເປັນ­ຕົ້ນ​ດ້ານ​ເນື້ອ​ໃນ ແລະ ພື້ນ­ຖານ​ໂຄງ​ລ່າງ​ຕ່າງໆມີ​ຄວາມ​ຄືບ​ຫນ້າ​ຕາມ​ກຳ­ນົດ.

ດ້ານ ທ່ານ ພົ​ຈວ. ສີ​ສະ­ຫວາດ ສີ​ຫາ​ວົງ ຕາງ­ຫນ້າ​ຄະ­ນະ​ກຳ​ມະການ​ປ້ອງ​ກັນ​ຊາດ-ປ້ອງ​ກັນຄວາມ​ສະ­ຫງົບກໍ່​ໄດ້​ກ່າວ​ວ່າ:  ຜ່ານ​ການ​ກະ­ກຽມ​ມາ​ຮອດ​ປະ­ຈຸບັນ ສະ­ພາບ​ຄວາມ​ສະ­ຫງົບ ສປປ ລາວ ແມ່ນ​ມີ​ຄວາມ​ຮຽບ​ຮ້ອຍດີ, ສະ­ເພາະ​ວຽກ​ງານ​ປ້ອງ​ກັນຊາດ-ປ້ອງ​ກັນ​ຄວາມ​ສະ­ຫງົບ ແມ່ນ​ມີ​ການ​ກຽມ­ພ້ອມ ແລະ ມີການ​ຝຶກ​ຊ້ອມ​ມາ​ຫລາຍ​ເດືອນ ທັງ​ນີ້ ເພື່ອ​ເປັນ​ການ​ຢັ້ງ­ຢືນ​ໃຫ້ ກອງ​ປະ­ຊຸມ​ອາ​ເຊັມ​ດຳ­ເນີນ​ໄປດ້ວຍ​ຄວາມ​ສຳ­ເລັດ​ຈົບ­ງາມ.

ຂໍ້ມູນຈາກຫນັງສືພິມ ເສດຖະກິດ-ສັງຄົມ, ຮຽບຮຽງໂດຍ: ເຊໂນທາມສ໌

 

 

 

 

 

 

 

 

ການສ້າງເທດສະບານແຂວງວຽງຈັນຄືບຫນ້າຕາມຂັ້ນ, ຂົວຂ້າມນໍ້າງື່ມສໍາເລັດ40%

ການສ້າງເທດສະບານແຂວງວຽງຈັນຄືບຫນ້າຕາມຂັ້ນ, ຂົວຂ້າມນໍ້າງື່ມສໍາເລັດ40%
 ການ​ສ້າງ​ເທສະ​ບານ​ແຂວງວຽຈັນ​ມີ​ຄວາມ​ຄືບ​ຫນ້າ​ຕາມ​ລໍາດັບ ຫລັງ​ຈາກ​ທີ່​ລົງມື​ກໍ່ສ້າງ​ມາ​ແຕ່​ທ້າຍ​ປີຜ່ານມາ. ດ້ານ​ຂົວ​ຂ້າມ​ນໍ້າ​ງື່ມ ທີ່​ເຊື່ອມ​ລະຫວ່າງ​ເມືອງ​ເກົ່າ​-ປາກ​ກະ​ຍຸງ ມາ​ຮອດ​ປັດຈຸບັນ​ໄດ້​ປະມານ40%, ສ່ວນ​ການສໍາຫລວດ​ຈັດ​ສັນ ​ແລະ ​ວາງ​ແຜນ​ລະອຽດ​ເຂດ​ໃຈກາງ​ເມືອງ​ໃຫມ່​ ຈະ​ສໍາ​ເລັດ​ຢ່າງ​ຊ້າ​ພາຍ​ໃນ​​ເດືອນຫນ້າ.

​ແຂວງ​ວຽງ​ຈັນ ​ເປັນ​ແຂວງ​ດຽວ​ທີ່​ບໍ່​ມີ​ເທດສະບານ​ແຂວງ ທີ່​ເປັນ​ສູນ​ລວມທາງ​ດ້ານ​ການ​ເມືອງ, ເສດຖະກິດ ​ແລະ​ວັດທະນະທຳ​ສັງຄົມ​ຄື​ແຂວງ​ອື່ນໆ ​ເຖິງ​ວ່າ​ຈະ​ຍົກ​ເມືອງ​ວຽງ​ຄຳ ເປັນ​ເທດສະບານ​ແຂວງ​ມາ​ໄດ້​ຫລາຍປີ ​ແຕ່​ກໍຍັງ​ບໍ່ມີ​ການ​ສ້າງ​ພຶ້ນຖານ​ໂຄງລ່າງ​ທີ່​ຈຳ​ເປັນ​ໃຫ້​ສົມ​ກັບ​ເປັນ​ເທດສະບານ​ແຂວງ​ເລີຍ.

ໂຄງການ​ສ້າງ​ເທດສະບານ​ແຂວງ​ວຽງ​ຈັນ ​ເລີ່​ມ​ເປັນ​ຮູບ​ເປັນ​ຮ່າງນັບ​ແຕ່​ສົກ​ປີຜ່ານມາ ຫລັງ​ຈາກ ລັດຖະບານ​ໄດ້​ຮັບຮອງ​ເອົາ​ແຜນການ​ສ້າງ​ເທດສະບານ​ແຂວງ​ວຽງຈັນ ຢູ່​ເມືອງ​ວຽງ​ຄໍາ  ດ້ວຍ​ມູນ​ຄ່າ​ການ​ລົງທຶນ​ຫລາຍ​ເຖິງ850​ຕື້ກີບ ​ເມື່ອ3​ປີຜ່ານມາ. ​ເຮັດ​ໃຫ້​ແຂວງ​ວຽງ​ຈັນ​ທີ່​ສ້າງ​ຕັ້ງ​ຂຶ້ນ​ມາ30​ປີ ຈາກ​ການ​ແຍກ​ອອກ​ຈາກ​ນະຄອນຫລວງ​ວຽງ​ຈັນ ຈະ​ມີ​ເທດສະບານ​ແຂວງ​​​ໂດຍ​ມີ​ສາຍ​ນໍ້າ​ງື່ມຜ່າ​ກາງໃຫ້​ເປັນ​ທີ່​ເອກ​ອ້າງ​. ປັດຈຸ​ບັນ​ອໍານາດ​ການ​ປົກຄອງ​ແຂວງ ພວມ​ເລັ່ງກໍ່ສ້າງ​ພື້ນຖານ​ໂຄງ​ລ່າງ​ເສັ້ນທາງ ​ແລະ ຂົວຂ້າມ​ນ້ຳ​ງື່ມ, ຫລັງຈາກ​ນັ້ນ​ກໍ​ຈະ​ລົງມື​ສ້າງ​ສໍານັກງານ ​ແລະ​ ຫ້ອງການ​ຕ່າງ​ໆ​ຂອງ​ລັດ.

ທ່ານ ຄໍາ​ເມິງ ພົງ​ທະ​ດີ ​ເຈົ້າ​ແຂວງໆ​ວຽງ​ຈັນ ກ່າວ​ວ່າ: ການ​ພັດທະນາ​ເທດສະ​ບານ​ແຂວງ ມາ​ຮອດ​ປັດຈຸບັນ​ຖື​ວ່າ​ມີ​ຄວາມ​ຄືບ​ຫນ້າ​ໃນ​ລະດັບ​ຫນຶ່ງ​ແລ້ວ ​ໂດຍ​ສະ​ເພາະ​ພາຍຫລັງ​​ທີ່​ລັດຖະບານ​ໄດ້​ອະນຸ​ມັດ​ງົບ​ໃນ​ການ​ລົງທຶນ, ​ແຂວງ​ວຽງ​ຈັນ ກໍ​ໄດ້​ເລັ່ງ​ໃສ່​ຈັດ​ຕັ້ງປະຕິບັດ​ໂຄງການ​ຈໍານວນ​ຫນຶ່ງ​ເຊັ່ນ: ​ໃນ​ປີ2011 ​ໄດ້​ອອກ​ແບບ​ເສັ້ນທາງ​ທັງ​ຫມົດ​ລະບົບ​ເທດສະບານ​ແຂວງ​ສໍາ​ເລັດ​ເປັນ​ພື້ນຖານ; ພ້ອມ​ດຽວ​ກັນ​ນີ້​ກໍ​ໄດ້​ມີ​ການ​ທະລຸ​ເສັ້ນທາງ​ໄດ້​ຈໍານວນ​ຫນຶ່ງ.

ສ່ວນ​ການກໍ່ສ້າງ​ຂົວ​ຂ້າມ​ນໍ້າ​ງື່ມ ຈຸດ​ບ້ານ​ເມືອງ​ເກົ່າ-ປາກ​ກະ​ຍຸງ ​ເມືອງ​ວຽງ​ຄໍາ ເຊິ່ງ​ເປັນ​ໂຄງກາ​ນ ທີ່ປະຊາຊົນ​​ແຂວງ​ວຽງ​ຈັນ​ ຄອງ​ຄອຍ​ມາ​ດົນກໍໄດ້​ມີ​ການ​ລົງມື​ກໍ່ສ້າງ​ມາ​ແຕ່ທ້າຍ​ປີ​ກາຍ ​ໂດຍ​​ແມ່ນ​ກຸ່ມ​ບໍລິ ສັດ​ມາລີ​ນີ​ເປັນ​ຜູ້​ລົງທຶນ​ ໃນ​ຮູບ​ແບບ​ກໍ່ສ້າງ​ດຳ​ເນີນ​ງານ ​ແລະ​ ມອບ​ໂອນ​ໃຫ້​ລັດ​ຄຸ້ມ​ຄອງ.

ຂົວ​ແຫ່ງ​ນີ້​ເປັນ​ຂົວ​ເບ​ຕົງ​ເສີມ​​ເຫລັກ ມີ​ມູນ​ຄ່າ​ກໍ່ສ້າງ16,8ລ້ານ​ໂດ​ລາ​ສະຫະລັດ ມີ​ຄວາມ​ຍາວ264​ແມັດມີຫນ້າ​ທາງ​ກວ້າງ8​ແມັດ ​ເປັນ​ທາງ​ສອງ​​ເລນ ມີ​ທາງ​ຄົນ​ຍ່າງ​ເບື້ອງລະ1,5​ແມັດ ​ແລະ​ມີທາງ​ລົດ​ເຂົ້າ​ຫາ​ຂົວ​ຍາວ630​ແມັດ ​​ຕິດ​ຕັ້ງ​ລະບົບ​ໄຟ​ເຍືອງ​ທາງ​ຄົບ​ຊຸດ. ປັດຈຸບັນ​ຄືບ​ຫນ້າ​ປະມານ40% ​ແລະ​ຄາດ​ວ່າ​ຈະ​ສໍາ​ເລັດ​ພາຍ​ໃນ​ເດືອນ​ພຶດສະພາ2013.

ທ່ານ​ເຈົ້າ​ແຂວງ ກ່າວ​ຕື່ມ​ວ່າ: ດຽວ​ນີ້ໄດ້ສໍາ​ເລັດ​ການ​ກໍ່ສ້າງ, ຍົກ​ລະດັບ, ຂະຫຍາຍ​ເສັ້ນທາງ​ແຕ່​ສາມ​ແຍກ​ໂພນ​ຫມີ ຫາ​ພະ​ແນ​ກການ​ເງິນ​ແຂວງ. ສ່ວນ​ໂຄງການ​ຂະຫຍາຍ​ສາມ​ແຍກ​ໂພນ​ຫມີ​​ແມ່ນໃກ້​ຈະ​ສໍາ​ເລັດ; ນອກ​ນັ້ນ​ຍັງ​ສໍາ​ເລັດ​ການສໍາຫລວດ-ອອກ​ແບບ​ເອົາ​ຕາ​ຂ່າຍ​ໄຟຟ້າ​ເຂົ້າ​ເທດສະບານ​ແຂວງ. ດ້ານການສໍາຫລວດ​ຈັດ​ສັນ ​ແລະ​ ວາງ​​ແຜນ​ລະອຽດ​ເຂດ​ໃຈກາງ​ຕົວ​ເມືອງ​ໃຫມ່ ຂອງ​ບໍລິສັດ​ນິກ​ເກັນ​ເຊັກ​ເກ(ຍີ່ປຸ່ນ) ຄາດ​ວ່າ​ຈະ​ສໍາ​​ເລັດ​ຢ່າງ​ຊ້າ​ໃນ​ເດືອນ​ຕຸລາ​ຈະ​ເຖິງ​ນີ້.

ສ່ວນ​ການ​ສໍາຫລວດ-ອອກ​ແບບ​ອາຄານ​ຫ້ອງ​ວ່າການ​ປົກຄອງ​ແຂວງ​ຫລັງ​ໃຫມ່ 5ຊັ້ນ  ຄາດ​ວ່າ​ຈະ​ສໍາ​ເລັດ​ພາຍ​ໃນ​ເດືອນ​ຫນ້າ​ນີ້, ຫລັງ​ຈາກ​ນັ້ນ​ຈຶ່ງ​ຈະ​ໄດ້​ຄົ້ນຄວ້າ​ຫາ​ຜູ້​ລົງທຶນ​ກໍ່ສ້າງ ​ເພື່ອ​ໃຫ້​​ໂຄງການດັ່ງກ່າວ​ສໍາ​ເລັດ​ຕາມ​ແຜນການ​ໃນ​ປີ2015, ທ່ານ​ເຈົ້າ​ແຂວງ​ກ່າວ.

​ໃນລະຫວ່າງ​ເດືອນ​ກໍລະກົດ ຫາ​ສິງຫາ 2012 ​ແຂວງ​ວຽງ​ຈັນ ຍັງ​ໄດ້​ເຊັນ​ບົດ​ບັນ​ທຶກ​ຊ່ວຍ​ຈໍາ 2​ໂຄງການ ​ແລະ ​ເຈລະຈາ​ອີກ​1​ໂຄງການ​ຄື: ​ໂຄງການ​ສໍາ​ຫລວດ​ອອກ​ແບບ ​ແລະ​ ກໍ່ສ້າງ​ເສົ້ນ​ທາງ​ແຕ່​ສາມ​ແຍກ​ໂພນ​ຫມີ-ທ່າ​ລາດ ​ແລະ​ ສາມ​ແຍກ​ໂພນ​ໂຮງ-ສາມ​ແຍກ​ໂພນ​ຫມີ, ປັດຈຸບັນ​ພວມ​ດໍາ​ເນີນ​ການສໍາຫລວດ​ອອກ​ແບບ​ຢູ່ ຄາດ​ວ່າ​ບໍ່​ເກີນ 6​ເດືອນ ຈະ​ໄດ້​ມີ​ການ​ເຊັນ​ສັນຍາ​ກໍ່ສ້າງ ​ແລະ​ສໍາ​ເລັດ​ການ​ເຈລະຈາ​ລາຄາ​ໂຄງການ​ກໍ່ສ້າງ​ເສັ້ນທາງ​ແຕ່​ສາມ​ແຍກ​ປາກ​ແຈ້ງ​ຫາ​ບ້ານ​ນາ​ໂພ.

ທ່ານ​ນາງ ສິງ​ຄຳ ຄົງ​ສະຫວັນ ຮອ​ງ​ເຈົ້າ​ແຂວງ​ວຽງ​ຈັນ  ກ່າວ​ໃນ​ພິທີ​ສະ​ແຫລ​ງຂ່າວ​ກ່ຽວ ກັບ​​ໂຄງການ​ພັດທະນາ​ເທດສະບານ​ແຂວງ​ວຽງ​ຈັນ​ເມື່ອ​ທ້າຍ​ປີຜ່ານມາ​ວ່າ: ​ແຂວງ​ວຽງ​ຈັນ  ໄດ້​ກຳນົດ​ເອົາ​​ເມືອງ​ວຽງ​ຄຳ​ເປັນ​ເທດສະບານ​ແຂວງ ​​ມີ​ເນື້ອ​ທີ່8.000​ເຮັກຕາ ​​ແບ່ງອອກ​ເປັນ14​ໂຄງການ​ຍ່ອຍ ມີ​ມູນ​ຄ່າ​ການ​ກໍ່ສ້າງ​ປະມານ827​ຕື້​ກີບ. ແຕ່​ນີ້ຫາ​ປີ2015 ຫວັງ​ຈະສຳ​ເລັດ​ທັງ14​ໂຄງການ ​ແຕ່​ງົບ​​ເກືອບ850ຕື້​ຄື​ບັນຫາ​ ​ໂດຍ​ໃນ2ປີ​ໄດ້​ງົບ​ພຽງ21​ຕື້ກີບ.

ຂໍ້ມູນຈາກຫນັງສືພິມ ເສດຖະກິດ-ການຄ້າ, ຮຽບຮຽງໂດຍ: ເຊໂນທາມ

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / ປ່ຽນ )

Twitter picture

You are commenting using your Twitter account. Log Out / ປ່ຽນ )

Facebook photo

You are commenting using your Facebook account. Log Out / ປ່ຽນ )

Google+ photo

You are commenting using your Google+ account. Log Out / ປ່ຽນ )

Connecting to %s

%d bloggers like this: